梅艷芳昨日到港台出席「抗SARS傑出獎選舉頒獎禮」，以演藝人協會主席身份領取「抗SARS傑出獎」。
對於連日來有報道指阿梅為見碧咸不顧身份，𢱑門票及自薦表演被拒，她昨日發火怒斥說：「本來開心睇波好簡單，點解要寫到咁？我唔係唔開心，係好煩，每個人都有偶像，使唔使掩住良心寫咁多。」
阿梅禁不住怒火繼續說：「小題大做，我要見佢（碧咸）唔係你哋講得咁核突，乜嘢去電視台𢱑歌唱失敗？我唱歌要收錢㗎，唱都係為沙士而唱。」問她是否因此才不去晚宴，阿梅說：「我點解做每件事都要俾你哋猜中，乜叫撲飛？人哋有邀請函，我亦有，乜叫搜括？識唔識字㗎？」
提到球賽當日有街上途人向霆鋒喝倒采，阿梅謂：「鬧人嗰個問下自己乜心態去諗人，係咪嗰個人自己博搶鏡？我就聽唔到，條街咁多人，一、兩個算係乜，可能係啲金毛怪，好似我呢啲呀。」
採訪、攝影：李珮洳