呢排新嘢出得多，跳樓貨就少啲，得隻包埋GBALinkCable嘅《POKEMONBOX》跳到一百蚊咁上下，講真買條原裝線都唔止。《SHININGSOUL2》就開始發力，新貨斷斷哋，二手都收兩嚿八，過開去日本又打爆咗機嘅話不妨放咗佢套現。
新Game大熱跑出係PS2《機動戰士GUNDAMSEED》同埋平面格鬥《GUILTYGEARXXRELOAD》，秋記有海報同電話卡送嗰幾間舖未到下晝就斷貨。高達Hit唔難理解，頭一日見買Game嘅都有兩三成係女仔，喺呢個市場嚟講已經算係少見。後者雖然喺香港唔係好受落，但日本呢邊可以話係平面格鬥一哥，受歡迎程度可以媲美香港麻雀機。隻垃圾之王《魔界轉生》亦喺新宿擺檔口，買Game可以參加抽獎，獎品算豐富，但一直拍烏蠅，冇計啦，學路過嘅㗎仔話齋：「今時今日，咁嘅多邊形畫面連師奶都呃唔到啦！」如果有朋友夠膽推介畀你，唔該同佢絕交，有舖頭勸你買，嗰間一定係黑店！
文：貓仔Ryo
●作者介紹
●曾任職香港遊戲雜誌編輯，現於日本讀書及工作。