陳奕迅（Eason）前晚與前度緋聞女友車婉婉到澳門做騷，二人在台上合唱時，女方不避嫌與Eason手拖手互望，但Eason卻發台瘟，數度忘記歌詞。
記者王連連澳門直擊
陳奕迅、車婉婉、梁詠琪、盧巧音、楊千嬅、關心妍、何韻詩、蘇永康和梁漢文（梁炳），前晚齊齊到澳門旅遊塔前地廣場出席「高Sing蹈音樂嘉年華——勁JamSing星Show」音樂會。
在芸芸歌手當中，竟以梁炳和楊千嬅風頭最勁，當梁炳一上台唱歌時，台下fans即一擁上前要求跟梁炳握手，好些fans因為太過肉緊握着梁炳的手不放，在拉拉扯扯之下，梁炳竟跌倒地上，而千嬅則被熱情fans用氣球掟中頭部。
及後Eason與前緋聞女友車婉婉合唱一曲《會過去的》，雖然二人曾傳緋聞，但車婉婉仍毫不避嫌地跟Eason手拖手互望，相反Eason卻在台上發台瘟，數度忘記歌詞。Eason在台上笑說：「我成日唔記得歌詞，但唱呢首歌就一定唔會唔記得，點知一講出嚟就出事！」
此外，蘇永康與許志安日前在記者會上互窒，一度令人以為這對好朋友不和，但蘇永康前晚解釋說：「安仔明知嗰日會多記者問我嘢，所以咪幫我擋囉，點會不和吖，你哋得閒睇吓我哋一齊去滑水咪知囉，個個都係我好兄弟，Dicky（張衞健）一返香港連屋企都唔返就嚟搵我。有位朋友sendSMS畀我，話我唔戴眼鏡更好，因為有眼鏡唔一定睇得更清楚，你以為真實嘅事反而係更模糊。」
蘇永康表示，即將舉行的演唱會是他最大目標，現時他不是滑水、做運動便是曬太陽。記者問到他與台灣女模林鳳英拍拖傳聞時，蘇永康說：「人哋都講咗話唔係我！不過，匪夷所思嘅事情，通常都會喺呢個時候發生。」
