黃伊汶（Emme）、Shine、麥浚龍、關心妍等人，噚日去到九龍灣展貿中心，出席一個由通心粉牌子舉行嘅跳舞活動，其間好多參賽者都上台比試舞技。近來改走跳舞路線嘅Emme，着住自己嘅戰衣，魚網衫加短裙跳舞，不知幾咁性感，而短裙入面重特登着珠片打底褲，載歌載舞。
Emme話自己稍後就會出埠去浮羅交怡公幹，佢重話順便去曬太陽，或者會喺嗰邊影啲靚相出純影集。不過擁有出眾身材嘅Emme就話唔會着三點式泳衣曬太陽，佢話：「我唔着三點式㗎！我個人好老套，我只係會着一件頭，但係都會帶定三點式泳衣。可能我較為錫身，惜肉如金嘛！」
雖然Emme改走性感路線，跳舞時一舉手一投足亦都好誘惑，但係估唔到佢個人都咁保守。佢話自己唔會着三點式泳衣曬太陽，但就試過去天體沙灘，佢話：「自己唔夠膽着，但我有去過天體沙灘昅嘢㗎！」
薛家燕噚日喺奧海城，出席「慈善奪寶之旅」，佢嘅爸爸同家姐都有嚟捧場，現場更有一個十多呎高嘅巨型「家燕媽媽」氣球出現。家燕姐話：「自從舊年漫畫出咗之後，產品都愈嚟愈多。近排我哋再多咗啲家居產品。而我知栢林仔嘅爸爸會做雷射trademark，我特登搵佢印幾十萬個trademark印喺啲產品上面，證明係正版。」
黃琛如噚日喺尖沙嘴出席公開活動，重擔任模特兒。見黃琛如着住件大露背衫跳hip-hop舞時，個樣驚驚青青咁，好唔自然，事後佢話：「我一向跳舞都唔叻，又唔識分左右，而且我係嚟到先知要跳舞，所以先咁雞手鴨腳。」
曾拍過《愛的空間》嘅韓國女星金河娜，最近又有套喜劇《我的Band5男友》會安排喺呢個月底上映。喺部戲入面，佢做一個補習老師，早排同權相佑喺韓國接受訪問，佢哋話對呢部喜劇都幾重視，希望香港觀眾會喜歡呢部戲。金河娜之前曾去過上海旅行，佢對上海美食讚口不絕，𠵱家講起一樣好雀躍，重話有機會一定要再去。
噚晚黃昏時分，楊受成一身casual打扮，着住涼鞋，同佢老婆以及一個戴cap帽嘅女仔急急腳入咗養和醫院，重一直走去登記處。登記完後，楊受成就話今日同班同事遊船河，有個同事撞親，所以就去醫院求診，佢之後重話：「咁咪順便探陳伯囉。」
鄭希怡（Yumiko）、吳浩康噚日到咗藍灣廣場出席「信和海陸空奪寶之旅」，佢哋重同現場觀眾大玩遊戲，場面熱鬧。以一身迷彩服飾示人嘅Yumiko就話以往都會相約一班朋友去摩星嶺玩wargame，佢話：「我今日呢套衫都係私伙㗎，我重有兩支槍㖭，之前都試過畀人射中塊面流血，好彩冇疤痕咋。」
