根據傳統智慧，個市企喺高位時，好多股仔都會諗吓批股集資抽水，一來可以增加公司內部資金，二來等隻股仔回一回，然後再嚟過。
升岡國際（485）之前折讓一成左右批股，諗住批完股跌少少之後再嚟過，不過人算不如天算，喺復牌之後隻股急跌，由配股前0.245元跌到去0.183元，跌足兩成五，但上個星期五好快咁又再炒番上兩毫二。聽講隻股喺呢次批股後，好快有後着，班大戶喺上星期鋤低咗之後，已經又再埋位，重話今次個價可以睇兩毫五。
不過睇隻股上個星期咁舞上舞落法，跟唔跟得過真係要自己諗諗。
上星期國內公布埋上海、北京等地居民可以利用個人身份嚟香港購物旅遊，令本地一班近日轉炒零售股嘅大戶非常興奮。佢地喺新旅遊協議下，好輕易就踢高一啲有概念嘅股份，就好似近排升得好急嘅恒豐金業（870）咁，單係近呢兩個星期，股價已經升咗5成，有行家講，佢哋後面班大戶好硬淨，買咗咁耐都重未手軟，可能重會有唔少上升空間，分分鐘揸長又得，揸短又得。不過伏勝就有啲保留，雖然話同胞遊港政策對本港零售有利，但股價已升咗咁多，再追風險都唔細，所以呢隻股只可以短炒一段時間，如果成交一縮，可能要等下次先至再有落車機會，所以呢類概念股只可以玩吓「一夜情」。
伏勝