家庭式MPV潮流大盛不減，時下歐、日車款不下十數部，然而，今日我哋特意搵嚟話對車款無研究嘅靚女向海嵐（Ann），以及近期備受演藝界追捧嘅標緻307SW；究竟一部另類法式MPV怎能異軍突起，響多款日式MPV環伺下仍深受車迷歡迎，而Ann又怎樣對它另眼相看呢？
記者、攝影：陳偉林
逢星期一至日出版
早輪，經常響晚間於「公仔箱」遇見嘅向海嵐（Ann），就好似老朋友咁親切；惟稍事休息後，近期佢又忙於新一套電視劇嘅拍攝工作。自言對汽車不太認識嘅Ann，自從由加拿大返港後加入娛樂圈，日常出外工作代步，陪伴響佢身邊會係一部四門日本房車；然而，響外國生活咗一段日子嘅Ann，查實亦曾有換車嘅念頭，之不過工作太困身，少有自己嘅私人時間，令換車念頭亦只好擱置一旁。「若然碰上合意的話，我想擁有一部較另類嘅歐洲車。」Ann說。
「早輪，我見過羅嘉良部標緻307SW，俾佢個天幕式玻璃頂嚇咗一跳！」Ann興奮地說。無諗過部車可以有咁大個玻璃頂，畀到你開揚嘅感覺之餘，三排七座位重好實用，置身其中尤其係中排，再拉低椅背仰卧片刻，令人身心舒暢外，響寧靜嘅車廂中沉思，又或者聆聽悠揚樂曲，都會令人精神容易鬆弛下來㗎！
「響外國揸車，無論行人或駕車者都會好禮讓同守法，之不過我返香港後，發覺禮讓只會令你停滯不前，重會畀尾隨車輛響號催促㖭！亦會因此令我精神緊張呢！」Ann不滿地說。家陣響香港駕車外出，要一眼關七之餘，重要動作敏捷，惟停車下來卻令人感覺有點累。但坐上呢部307SW，發覺高人一等嘅視野清晰，加上輕盈軚盤轉向，還有附加Sport模式嘅4前速Tiptronic半自動波箱，既可以安逸地駕車，遇有需要時重可以有房跑車反應㖭！307SW有以上多項優點，難怪Ann嘴角會露出一絲笑意，還豎起拇指稱讚呢！
引擎：1997cc直4DOHC
馬力：138ps/6000rpm
扭力：19.4kgm/4100rpm
尺碼：4149×1757×1544mm
軸距：2708mm；車重：1391kg
0-100公里：12.0秒
極速：196km/h
新車售價：$189,900起
查詢：靈獅汽車（28663000）
平日揸開日本四門轎車作代步嘅Ann，對呢部咁有RVFeel嘅標緻307SW，初首嘅觀感係大部又份量十足，惟坐響駕駛席上，佢覺得部車視野好廣闊，車廂鋪排跟日本車好唔同，望見個幾近天幕式嘅玻璃車頂，佢重「嘩！」咗一聲㖭！兜咗一陣，佢話部車易睇位之餘駕駛又容易，而至滿意重係一個咁闊大嘅車廂，好啱佢長時間出外景工作喎！
唔講唔知，對代步車無甚要求嘅Ann，原來好喜歡無拘無束咁駕車四圍逛，要欣賞大自然嘅景色，至合意莫過於一部開篷車作伴啦！而Ann聞得標緻遲吓會推出新款307CC，躍躍欲試之餘，或許佢會成為首批新車車主之一㗎！