超人幾年前賣「橙」一鋪賺咗成千億元，堪稱「世紀交易」，原來呢單交易背後，同港進聯立法會議員許長青都有啲關係，不過當日佢唔識貨，只得二十萬落袋。
許老爺同八方講，七十年代做製衣時有個中東客要佢「代產」蘋果牌牛仔褲，但當日蘋果牌已賣到街知巷聞，許老爺為免麻煩，同個客講話不如另起爐灶做條「橙」牌牛仔褲啦，佢怕執輸隨即註冊埋「橙」、「Orange」做商標，但個客堅持鍾情蘋果，合作計劃告吹，個「橙」亦成為名副其實「籮底橙」。
許老爺袋埋個「橙」十幾二十年，點知幾年前突然有個聲稱做成衣嘅神秘人搵佢買「橙」，開價五千，許老爺對呢個價錢自然不放在眼內，個神秘人再開價二十萬，許老爺先心動，結果「籮底橙」以二十萬成交，「個神秘人搵律師樓包晒所有使費，我一毫子都唔使畀就收咗廿萬。」
許老爺呢個賣「橙」故事講到呢度，相信大家都估到最終「橙」落誰家，八方問許老爺如果早知……搵夠上岸嘅佢笑笑口話：「梗係唔賣啦！」
（圖）港進聯立法會議員許長青
傳真︰2623-9278
電郵︰