攝氏三十度高溫下，拍拖行完街，最好當然係搵個地方坐低過一過冷河，順道來一杯ColdDrink或ColdDish，令全身內內外外都涼浸浸。要坐得舒服、食得獨特，普通茶餐廳、快餐店又點可以滿足你所有的要求？唔知帶女朋友仔去邊度解暑，不如先參考以下的介紹！
冰杯外形有如雪山，白濛濛嘅冰杯內載住以藍莓、士多啤梨、菠蘿、檸檬汁調製而成嘅雜果汁，同時在果汁內加入新鮮沙田柚肉，品嘗鮮香果汁之餘重可以咬到粒粒果肉，入口勁冰凍又有口感。冰杯可以維持兩個鐘，而且果汁會隨住時間慢慢滲透，令冰杯變色，驟眼看就好似一個夜光杯，飲到最尾，果汁重會變成沙冰，冰涼感覺加倍。
Tiramisu味的雪糕係另一款自家炮製嘅雪糕，甜品師傅無加任何芝士，但做出來嘅味道同傳統意大利Tiramisu差不多。入口香濃軟滑，味道與一般雪糕唔同，味道別樹一幟，感覺有點似在食一口會溶喺口嘅Tiramisu一樣。
除冰杯外，師傅重會自製冰碗，冰碗可以「雪」住嚿雪糕，等客人可以慢慢歎。雪糕是自家製的南瓜雪糕，用新鮮南瓜肉為主，無添加成份，味道偏重於果肉味之餘又較香滑、不太甜，有食完想再食嘅衝動，加上天鵝造型特別，小朋友一定鍾意。
甜品師傅會先將冰粒放入刨冰機內刨成碎冰，然後逐少逐少將冰堆砌成杯形同碗形，由於製作需時，所以每日每款味道都只限賣10杯，售完即止。
店名：Mint
電話：27355887
地址：尖沙嘴廣東道122-126號地下
潮流興玩Crossover，走中高級路線嘅快餐店can‧teen都在果汁上大玩Crossover，利用唔同生果嘅味道特性左配右搭，調製出多款健康生果特飲，自問係潮友又點可以錯過？
店名：can‧teen
電話：25246792
地址：中環遮打道太子大廈閣樓M20-M28
用新鮮蜜桃肉、乳酪、奇異果汁加碎冰打製而成，味道以蜜桃為主，陣陣桃香已叫你一試愛上。乳酪味道雖然唔多覺，但足以令整杯口感變得香滑，啖啖冰涼感覺，叫蜜桃日光浴，似乎有點兒不合襯！
雖然叫紅莓漩渦，但原來唔止得紅莓一種生果咁簡單，由紅莓、西瓜、青檸汁三種唔同味道混合後，得出來嘅結果係有少少紅莓味，少少西瓜味，味道頗特別，值得一試。
要數「莓」力十足，非呢杯莓子和風莫屬，一杯有齊晒藍莓、士多啤梨汁、桑莓汁同橙汁，唔同嘅莓味調和出另一種濃郁莓香，啖啖冰凍果香，一啖已足夠幫你降溫。
開放式水吧，一目了然，客人買飛後，有專人幫你即刻調製各種飲品，保證新鮮。
高溫下胃口大失，唔知食乜好？置身高級Cafe歎住特色冷盤，呢個Idea又如何？為迎接夏日，CafeLandmark推出一系列以海鮮及生果作主導嘅冷盤，再配合各種大廚自家研製嘅開胃汁料，賣相、味道都畀到你陣陣涼意！
餐廳開在大型商場內，採用開放式設計，置身其中毫無侷促感，大大張梳化令你坐得自在舒適。
店名：CafeLandmark
電話：25264200
地址：中環置地廣場1樓
以夏日瓜果入饌，配合鮮甜大蝦，材料簡單，但配搭絕不馬虎。蜜瓜、皺皮瓜、蘋果沙律用青瓜薄片重重包圍，沙律醬不多，清怡為主，沙律上鋪上新鮮大蝦，伴以哈蜜瓜、芒果，最後用檸檬汁、芒果汁、蜜糖調製成另一種沙律汁，味道酸香醒胃。
有涼拌兩個字就知係夏日涼品之選，豆腐、牛油果、沙律菜、番茄粒，每層材料都伴以唔同味道嘅特製沙律汁，一層叠一層，口感、味道「層」出不窮，大廚巧妙咁運用日式天婦羅炸漿作點綴，務求令平平無奇嘅頭腐可以多一種香脆口感。
今次所選用嘅木瓜仔大有來頭，多汁香甜，屬夏威夷頂級貨，用木瓜充當船，放入各式海鮮如煙三文魚、龍蝦箝、鮮蟹肉、大蝦、帶子等，伴以紅、黃椒絲、生洋葱絲等爽脆配菜。用特製中華沙律汁調味，汁味酸中帶濃厚麻油香，洋葱絲經特別處理後全無辣味，畀人一種與別不同嘅清新感覺。