早前有傳籮霸珍妮花洛庇絲（JenniferLopez）因男友班亞弗力（BenAffleck）與脫衣舞孃有不軌行為而要分手，雖然籮霸口口聲聲話佢哋冇事，但係咪話我羅拉心地差，早排佢哋兩個喺節目度玩煮飯仔嘅融洽氣氛，可能已經成為絕唱！
籮霸同班仔早排接受美國NBC電視台訪問，籮霸親自下廚，重話要煮一道家傳雞飯「ChickenalaLopez」畀班仔歎吓。其實籮霸所謂嘅家傳秘方，簡直兒戲到痹，佢不但用咗成三分一樽油煎一塊雞扒，之後重配埋一味胡椒多過料嘅辣豆醬。睇見籮霸嗰副亂嚟樣，難怪佢自己試食完都覺得難頂。
不過煮得難食唔緊要，喺籮霸一聲令下，班仔即刻食咗碟煎燶雞扒配爛飯，難為佢之後重要猛讚好食。其實喺煮飯期間，籮霸同班仔不停喺鏡頭前卿卿我我，心理學家從佢哋嘅身體語言話佢哋係100%相愛，不過自從班仔畀脫衣舞孃爆料之後，佢哋夫唱婦隨嘅和諧場面，唔知幾時先可以重現呢？