中文大學當然唔係以英語為教學語言嘅大學，教授可以用英語、國語、粵語教學，如果佢哋𠵱家多用英語亦好平常。中大生不必為此而鬧左丁山唔識嘢。中文大學喺香港係一個專有名詞，與中文中學不同，社會上亦唔以為中文大學學生只識中文，以最近宣佈嘅IELTS成績計，中大學生整體平均成績排第二，比第一名嘅歷史悠久嘅英文大學——香港大學，只係差些少啫。如果以增值計，嶺南第一，港大第尾，中大包尾第二。
賓架C係中大新亞書院畢業生，佢讀書之時，老師以湖南國語、四川國語、山東國語上課，聽到賓架C頭昏眼花，兩三個月唔知先生講乜，但係佢今日上京見中央高官，啲高官未必個個識講純正國語，但賓架C乜口音都聽得掂，想落亦係拜昔年上堂聽書之賜。賓架C啲同學上堂聽四川口音，寫英文筆記，讀書先讀Samuelson，唔明白即刻轉睇「施建生」（台大教授施建生嘅經濟學教材書，類似Samuelson中文版），考試時一張卷用英文答，另一張卷用中文答，都唔知幾過癮。呢種事情喺香港大學呢間英文大學一定唔會發生！嗰陣嘅中文中學學生，來自培正、何文田、金文泰、真光、寶血嘅，排隊操入中大，佢哋入到去，讀英文教科書（如Samuelson）查字典查到手軟，但一樣捱到上去，從不投訴甚麼難以適應嘅問題，考學位試之後，好多中中生攞一級榮譽㖭。張敏儀就係寶血產品入英文系，一年班讀到面青啦！