以前出旺角，撞口撞面十個有九個都會有杯沙冰喺手，但自從沙士風暴之後，以往橫行旺角嘅沙冰如今已風光不再。一雞死一雞鳴，街頭飲品依然大熱，取而代之係各款靠「溝」出位嘅飲品，荔枝溝綠茶、布甸溝奶茶、蘋果汁溝利賓納等，口味多不勝數，想知重有乜勁潮旺角街頭飲品？𠵱家逐一為你介紹！
後起之秀白苦瓜汁，到今個夏季走勢依然凌厲，有舖頭更加大玩Crossover，將唔同飲品加入白苦瓜汁內混合打製出唔同嘅新口味，雖然味道唔係人人接受得到，但勝在清熱、滋潤，總比沙冰有「營」得多。
店名：菓味人間
地址：旺角西洋菜南街1號
白苦瓜汁清熱、雪梨汁滋潤、益力多有益，將三種營養飲品混合，就調製成呢杯有減肥清熱作用嘅白苦瓜特飲。第一啖甘甘哋，嗒落有少少益力多酸味，鍾意白苦瓜汁的話可能會較易接受。
呢款白苦瓜蜂蜜口味較大眾化，同樣用白苦瓜榨汁，配合蜂蜜溝勻，蜂蜜嘅甜味將白苦瓜汁嘅苦澀減低，甜中帶甘，味道層次分明，飲落都幾甘。
一向大玩創意嘅水世界今期又有新搞作，最新登場有各種凍花茶，好似薰衣草、伊甸玫瑰，另外又有大人細路都啱嘅鮮果特飲，味道各異但同樣令你Cool到震。
店名：水世界
電話：27892933
地址：旺角通菜街63號地下
蒟蒻並非甚麼新口味，但只要稍為將配搭變一變，都可以有另一番滋味。將蒟蒻切成幼條，變成好似冷麵一樣，配上鮮打芒果汁、芒果肉、雪糕，一條條冰凍蒟蒻滑入口，感覺涼透心。
要數夏天清熱佳品又點少得菊花茶？老闆將新鮮菊花調製成凍茶外，重特別加入綠茶果凍同薄荷兩種清涼元素，令菊花茶入口倍加清涼之外，重有冰涼滑嘟嘟果凍滑入喉嚨，配搭頗新鮮！
用鮮榨果汁溝梳打水，就變成呢款泡泡特飲，有香橙、檸檬同西瓜三種口味，健康解渴，飲多杯都唔怕肥。
近年興纖體，纖體公司愈開愈多，但估唔到今個夏日連街頭飲品都要「纖」埋一份。好似鴻福堂新出嘅「纖雪」、「纖露」系列，全以蔬果、麥皮等高纖食物為主，健康又唔肥，至啱愛靚一族！
店名：鴻福堂健康快線
電話：23969006
地址：旺角亞皆老街72號地下
用麥皮混合紫米、鮮奶等材料打製而成，全杯以高纖作大前提，入口有粒粒煙韌紫米外，重有面層嘅香脆朱古力脆米，味道帶有香濃麥皮味道，另有火麻、蔘蜜、豆腐，味道各有不同。
用木瓜肉加入少量雪糕、奶、冰及糖水調製而成，有滋潤皮膚作用，入口介乎沙冰同奶昔之間，入口冰凍香滑兼有陣陣木瓜香甜，甜度偏低，喜歡的話可以要求加甜，另有多款蔬果味道任揀。