香港政界有唔少球迷，講到最老資格，就非位居國家領導人級嘅霍英東莫屬，但八方估唔到，皇馬熱「扯」起霍老「波根」，連見廣東省省長黃華華，佢老人家都唔講中港合作、南沙發展，反而講咗四十五分鐘新中國足球發展史。
話說黃華華早排嚟香港，當然有見一班愛國商界人士。黃省長發表完講話，就輪到與會者講，雖然與會者大大話話幾十人，但要論資排輩，霍老當仁不讓，梗係佢老人家講先！勢估唔到霍老唔講挺董、唔講經濟，反而講佢當年點帶領中國國家足球隊南征北討嘅歷史。當年霍老出錢出力，以體育為國家打開與外國溝通大門，功在國家，當中辛酸不足為外人道，但佢老人家咁樣一講，就冇咗四十五分鐘。
第二個發言就係賭王何鴻燊，賭王又係香港地產建設商會主席，佢老人家又係唔講中港融合，走去講地產樓價，同樣都係一開口就停唔到，咁樣賭王個人又solo半粒鐘。有與會者事後同八方講，去到呢個時候，已近午飯時間，大家個肚已經開始打鼓，但竟然重有人要發言。
究竟邊個咁勇呢？咪就係親北京新貴，第三屆行政長官首席大熱門，CY梁是也！振英哥都算克己，少少地講咗十五分鐘，但最神奇係，八方問咗幾個人，冇人對佢講乜有印象，即係話佢講嘢言之無物，咁樣點做首席大熱門？
傳真︰2623-9278
電郵︰