張惠妹噚日三十一歲生日，前晚經理人同好友幫阿妹喺台北敦化南路嘅一間酒館，搞咗個生日會，好友大S徐熙媛、小S徐熙娣、范曉萱同林曉培都有出席，連阿妹嘅前男友周立璟都去咗。張惠妹事前唔知有呢個生日會，佢約朋友同佢慶祝，個個話唔得閒，搞到佢好唔開心，所以前晚見到有咁多人，感動到攬住啲朋友喊咗出嚟。
阿妹前晚興致好高，逢人就敬酒，到切蛋糕時，佢已經醉咗，之後阿妹走埋去樓上記者嗰邊，周立璟見阿妹醉醉哋，擔心佢有事，所以走上樓睇吓佢點，點知阿妹當住成班記者同周立璟講話：「你沒有選擇我，SoBad！」𠵱家同AnaR.拍緊拖嘅周立璟即時好尷尬，而現場嘅記者都唔知點反應，不過睇得出周立璟雖然同阿妹分咗手，但對佢仍然好關心。
身為纖體產品代言人嘅利嘉兒，噚日喺主辦商安排之下乘坐一架鮮黃色保時捷去銅鑼灣世貿中心宣傳。利嘉兒纖體成功後，噚日重着上小背心同熱褲現身，一於騷一騷美好身段，不過利嘉兒就話：「我唔須要着三點式宣傳，因為合約冇定明，而我亦冇諗過因為瘦咗會拍寫真。」
有「人工美女」稱號嘅台灣女星李庭，噚日喺尖沙嘴幫纖體中心擔任開幕嘉賓。
李庭喺台灣同成龍傳過緋聞，佢話嚟港後已冇同對方聯絡，原來李庭都知Yumiko有「龍嫂」嘅稱號。問李庭覺得自己靚啲定係Yumiko靚啲嘅時候，佢話：「成功纖體後，應該是我較漂亮吧。」
組合Boy'Z、蔣雅文（Mandy）同王家敏（Koey）噚日出席喺灣仔會展舉行嘅簽名會同網劇嘅宣傳活動。Mandy同Koey日前可以同萬人迷碧咸合照，兩個人都話難得，而Boy'Z就埋怨佢哋唔帶埋佢哋去，搞到佢哋冇得同呢位萬人迷合照。
陳雅倫噚日出席喺葵芳新都會廣場舉行嘅保良局活動，噚日天氣好熱，陳雅倫都知道炎炎夏日令到人好辛苦，所以佢就着咗件魚網衫，重真空上陣，請大家食冰淇淋咁話喎，認真大方！但陳雅倫自己就話唔覺得好性感，佢重話：「大家觀點角度唔同啫，咁今日真係好熱嘛。」
