皇馬前晚喺大球場踢咗場好波，𠱁得全港市民好開心。另一邊廂巴塞隆拿可能唔甘心俾你皇馬威晒，喺作客英格蘭對李斯特城一場熱身賽中，亦踢出一場好波，獲得全場掌聲離場。
雖然巴塞隆拿只係由沙維奧拿射入一球，小勝主隊一比○，重有高古食紅牌被趕出場。但全場李斯特城球迷，都為巴塞隆拿嘅出色表現拍爛手掌，而呢場波更打破李斯特城喺新主場獲加碗入場人數紀錄，有成三萬二千幾人㖭！
「細哨」朗拿甸奴亦喺呢場熱身賽踢出身價波，係獲得最多喝采聲嘅球員。可能係啲球迷想睇吓呢個連國內班霸曼聯都得唔到嘅好波之人嘅技術啦！
由於莎蓮娜近排因傷退出賽事，令到史施達絲有機會取而代之升上世界第一；只要史施達絲喺洛杉磯網賽過多兩關捧走獎盃，就可以成為自二十八年前推出世界排名制以嚟，唯一未贏過大滿貫錦標嘅世界首席球手；佢能唔能夠「創先河」，過埋星期日就可以揭曉啦！
愛華頓會唔會同李鐵簽長約，到𠵱家仍然係未知數，但愛華頓日前影新球季大合照時，就預埋李鐵一份。其實，早前公布新球季波衫號碼時，將十二號畀番李鐵，以為會簽埋長約，點知一直拖字訣，我求大俠希望佢今次影埋全家福後，就唔使愁啦！
利物浦領隊侯利亞表明會引入法國援兵，作為球隊未來發展方向，果然繼勒泰歷同施拿馬後，喺聖伊天再簽得只得十八歲嘅法國中堅美查尼。據講，美查尼一直俾、曼聯及阿仙奴睇中，結果侯利亞搶灘成功。我求大俠睇侯利亞咁嘅組軍方針，真係想挑戰同鄉雲格，鬥爭有潛質法國兵。
文迪達轉會拉素都已經有兩年時間，但係拉素當年用成三千二百萬鎊，喺華倫西亞收購佢時筆轉會費，到𠵱家重有五百萬鎊尾數未畀，搞到華倫西亞準備入稟追數，或者要拉素讓出盧比斯作賠償。拉素當年咁「豪」，連簡尼捷達同費奧利都一擲千金，估唔到𠵱家搞到咁悲。