咪以為中國鬼最猛，來自法國的Mathilde、加拿大的DanaMcDonald、英國的Gemma及俄羅斯的Vicky，雖然都只得二十來歲，但已有不少驚慄的親身撞鬼經歷，記者採訪當晚突然遇上黃色暴雨警告，橫風橫雨之下講述她們在家鄉的真實鬼故事（認真好氣氛！），兩女都說留港只為散散心，希望忘記以往不愉快的經歷……但她們似乎仍未知道，將會遇上香港最猛鬼的一日──農曆七月十四！
來自法國南部Marscille嘅28歲Mathilde，曾經遇過令人驚嚇嘅事情。Mathilde記得10年前剛啱考到車牌後4個月，有晚駕車到朋友家開Party，由於朋友住近郊區，所以就泊喺一座較偏僻嘅停車場內。約凌晨2點Party完畢，佢正想喺停車場行去取車嗰陣，Mathilde已大感不妙。
因為當時係夏天，無理由會一路行一路陰風陣陣，而且不時有「滴達、滴達」聲由遠至近向其發出。當Mathilde行到汽車之際，不時有青色閃光從停車場外射進，令到Mathilde慌張到搵唔到車匙開門。跑進車廂後，便狂踩油門飛車而逃。其後，Mathilde才得知停車場早喺6日前發生劫殺案，聽後Mathilde就嚇到半死病咗兩個星期，至今Mathilde每次取車都要男朋友陪，諗番起都話驚驚。
Mathilde聲稱佢身邊嘅朋友亦遇過鬼怪事情，佢有一班朋友到過一間荒廢大屋玩西方碟仙遊戲，誰知請來數年前喺屋內被人謀殺嘅女死者靈魂。女死者對於一班陌生人闖進自己屋企感到十分氣憤，即時命眾人立刻離去，否則燒死佢哋。初時呢班人唔多相信，但鬼魂說罷屋外嘅樹林即起大火，眾人即時逃跑；到咗第二日返回大屋，大屋已被燒為平地，而日後Mathilde及其朋友都深信世上確實有鬼魂存在！
第二個被鬼嚇嘅少女，係嚟自加拿大Saskatchewan嘅22歲DanaMcDonald。Dana最驚嚇而又親歷其境的故事，係佢曾經喺美國南部讀書時喺女廁遇到男鬼。當時晚上11點，Dana飲完酒正於廁所內洗面，誰知洗面後一抬頭，Dana隱約見到一個屬於男性嘅鬼影對佢微笑。初時以為自己醉咗，但其後又見鬼影喺廁所內竄跑，呢次「驚」驗真係嚇到Dana至今仍記憶猶新，話過以後一定要人陪佢一齊去廁所。
嚟自英國嘅22歲GemmaRogers，記得一年前喺英國做暑期工，一般佢只會工作至下午六點，但因有一次要趕一個大project，Gemma要開OT，當晚由於工作太攰，所以佢就喺寫字枱上瞓着咗，約凌晨兩點左右，Gemma矇矇矓矓聽到背後有怪聲，聲響唔算好大但頻密。最後Gemma決定走去後面睇吓，一睇見到後面嘅櫃桶竟然全部拉晒出嚟，由於當晚確實只有Gemma一個，呢個時候Gemma嘢都唔執，立即走人，隔咗兩日佢就辭職。
有俄羅斯血統嘅Vicky，記得最驚嚇嘅一次係發生於佢嘅家鄉，當時佢只有14歲。Vicky去緊朋友屋企，諗住行捷徑就穿過一個地盤，當晚燈光好暗，地下又凹凸不平，誰知突然喺黑暗一角處發出一聲巨響，嚇到Vicky飛奔狂跑。到第二日朋友話畀佢知，原來當晚有一個女人跳樓，就剛啱跌入該地盤內，Vicky話如果佢八卦去睇，一定嚇死！