踏入八月，日本豐田車廠先後為旗下多款車系推出升級新版，繼昨日我哋為大家介紹過Facelifted新版Rav4後，旗下頂級豪華轎車凌志LS430（即日版豐田Celsior），推出Facelifted新版型號以吸引用家。
以外表而言，新版LS430外形驟眼看來與原有型號相近，但當細心留意下，定能察覺到頭泵把用上新設計，就連頭燈及尾燈都屬新款式，從而令車子造型看來更見有一份豪邁氣派；車廂內部亦見寬敞闊落，而前後兩排座椅更用上高級真皮鑲嵌，承托力亦較前來得更好，而中控台設備配搭亦見齊全，當然唔少得重有一套出色嘅高級音響組合啦！至於引擎配搭方面，新車則採用一台編號為3UZ-FE嘅4.3公升V8偈，馬力輸出為280ps/5600rpm，扭力則為43.8kgm/4000rpm，輔以一套全新嘅6前速自動波箱，性能表現可謂毋庸置疑，有興趣嘅車迷，不妨密切留意新車在港推出日期喇！