民建聯邀葉太入黨 - 李八方

  民建聯邀葉太入黨 - 李八方

23條一役之後,民建聯四面楚歌,今年同明年嘅區議會同立法會選情告急,八方勢估唔到佢哋為挽回頹勢,竟然諗到一條「絕世好橋」:請23條悍將葉劉淑儀加入民建聯,代表該黨參選!
噚日曾鈺成喺《鏡報》酒會上同記者爆料,搞到全場哄動,不過佢話葉劉聽到佢哋建議冇乜表示,佢估計係因為葉劉𠵱家最緊張個寶貝女,唔會諗其他嘢住。
正所謂成也蕭何,敗也蕭何,民建聯因為同葉劉一齊強推23條而失民心,轉頭又打葉劉強勢作風嘅主意,如果葉劉日後真係應承,分分鐘成為左派大旗手,局面真係難以估計。
曾鈺成又講起最近同梁錦松食飯,話題只限佢個BB女,但佢覺得阿松非池中物,遲早會出番嚟為港人「服務」。照咁睇,阿松、葉劉呢頭翻身下馬,嗰頭又有可能東山復出。香港市民冇票冇權,睇嚟都係冇聲出嘅多。
(圖)葉劉𠵱家最緊張個寶貝女,相信唔會睬民建聯。


傳真︰2623-9278
電郵︰[email protected]