今個禮拜，相信各位水貨迷可以唞唞先，原因大部份水貨商人都停飛一個禮拜，留番喺香港睇皇馬場波。你要知道十個水貨佬，九個愛足球，而佢哋通常飛禮拜二、三，禮拜六或一返香港。難得一次過六條煙嚟，所以好多水貨佬都情願唞番吓，入場睇波。而坐咩位就代表自己個身份同地位。好似袁仁祥咁，佢就撲到千五蚊飛，據佢講以每張四千蚊炒番嚟，兩個人去睇，計埋食飯就可以使接近過萬，唔怪得佢話去睇場波重貴過飛一轉日本，重未計因為停飛一個禮拜而導致生意上嘅損失。但袁仁祥貴為水貨大亨，唔通叫佢同啲學生哥爭位坐睇百五蚊學生飛咩？除祥哥外，潮界經紀「大隻標」今次亦都出動，以一身裏原宿加上成身都係Crossover打扮入場，引嚟唔少「裏猿猴」迷嘅豔羨目光，重搶鏡過碧咸。
文：大食Jack