小初幫襯開嘅證券行有皇馬波飛送，但由於唔係靚位同埋費事同人迫，所以情願收市後約埋班經紀朋友齊齊落pub睇波好過。噚日大家都冇乜心情炒股，講波多過講股。
不過，經紀陳有個客仔同小初哭股喪，話輸隻生命科技（1180）輸得好淒涼，事實證明炒股唔識止蝕，真係好容易搞到重傷。
生命科技自從公布賣藥廠之後，股價連續兩日急跌，噚日再跌21.5％，收0.073元，成交股數2.89億股，金額高達2255萬元，睇嚟今次真係有股東唔高興沽貨，唔係玩震倉咁簡單。
經紀陳話，佢個客仔有個朋友做芬佬，睇過生命科技盤生意，話公司隻肝藥真係好掂，所以佢先至跟風一齊上車，就算早排隻股2供1，每股供0.10元，佢亦跟住供，諗住溝淡啲貴貨。
點知今次生命科技居然賣廠，好似真係激親芬佬，皆因過往公司頻頻集資，都係話用作增加生產力，但搞咗咁耐一直唔見有錢賺，重跟手連藥廠都賣埋，芬佬唔激氣沽貨先至奇。
慕容小初