顧紀筠出書教鑑證寶石

顧紀筠昨日到尖東出席「金鑽迎夏日」珠寶活動，並即場講解揀選珠寶的心得。出動過百萬元私伙鑽飾亮相的她，透露擁有寶石鑑證的專業資格多年。
顧紀筠說：「幾年前已經喺美國紐約用咗一年、成十萬蚊，讀咗個寶石鑑證師課程。九七年返到香港，因為忙於做無綫節目，又怕生意唔好，先冇搞，𠵱家都希望出一本書或刊物，教香港人揀鑽石首飾，香港人呢方面知識好落後，重停留喺十年前。」

「大粒先睇得上眼」
顧紀筠的鑽石戒指重達五卡，她透露由細到大都愛「巨石」，她說：「我初出道做珠寶櫥窗設計員，全部都係『麻雀』咁大嘅靚石，培養到我都要大粒石先睇得上眼。」同場更有模特兒示範多套紅寶、鑽石首飾，其中包括一枚巨型綠寶戒指，價值逾八十五萬元。