容祖兒（Joey）、Twins同鄭希怡（Yumiko）噚日喺將軍澳電視廣播城出席《2003全球華人新秀歌唱大賽》拜神儀式。
Yumiko噚日因為唔知醒遲大到，好在嚟到重趕得切拜神，佢重主動提起自己嘅花名「龍嫂」，佢話：「我前晚去睇《飛龍再生》首映，啲人個個都叫我龍嫂，連老闆（楊受成）都係咁叫我，大哥（成龍）聽到都有笑，不過都叫咗咁耐，我都唔介意。」
而Yumiko噚日去漫畫展出席簽名會時，俾個男fans飛撲索吻，佢即時向後退，但最終都俾人錫咗啖，而個男fans就俾人捉咗落台。事後Yumiko話之前都有見過呢個男fans，但估唔到佢會咁瘋狂。
而Twins噚日連走兩場，拜完神後又去西九龍中心做兒歌VCD簽名會。拜神時，蔡卓妍（阿Sa）攞住啲金銀衣紙太耐，差啲燒親手，好在Joey提醒阿Sa，重大叫：「你快啲掟啦！」跟住阿Sa就將啲金銀衣紙好似個火球咁掟喺地。而Twins隻兒歌碟出咗兩星期，已經有金唱片成績，重有好多學校想將隻碟用嚟做教材㖭。
蕭正楠噚日去香港大會堂出席演出《小海白與你開心救地球》舞台劇，佢話自己好耐冇返過屋企，所以畀唔到舞台劇飛屋企人，好彩佢哋買晒飛支持佢。蕭正楠重話如果呢個兒童劇反應好嘅話，好可能會去第二個地方再上演，不過佢就擔心到時度唔到期。
麥浚龍（Juno）同方力申（Alex）噚日出席灣仔漫畫節活動，Juno即席幫歌迷畫肖像漫畫，但佢就唔係好滿意自己嘅畫功，因為往往會將啲人畫得好肥。而Alex話就快去韓國參加比賽，之後就會專注工作，不過佢話依然會keep住練水。
陳啟泰同珈潁日前喺大嶼山大浪灣，拍攝亞視宣傳片，內容講述佢哋喺海灘邂逅。
雖然陳啟泰同珈潁異口同聲話非常滿意出嚟嘅效果，但由於拍攝當日天氣相當炎熱，佢哋喺猛烈陽光下暴曬六、七個鐘，搞到皮膚傷晒，慘變「燒豬」。
譚小環噚日出席喺黃大仙舉行嘅「一日廚師大招募」活動，原本小環買咗四張千五蚊嘅波飛睇噚晚皇馬場球賽，不過因為臨時有嘢做，所以去唔到，嗰四張飛只好益屋企人。小環提起睇唔到場球賽，就扁晒嘴話好遺憾，因為佢好鍾意睇波，以前喺英國讀書，就試過用兩個月人工，買咗十幾件波衫，搞到要捱麵包。
章小蕙噚日喺中環時裝店執貨裝箱，準備月中喺台灣舉行大傾銷。佢話準備咗一百箱今季同上季嘅時裝，當中包括唔少名牌。章小蕙話：「真係要散貨，香港個市全部死晒！沙士之後我都渾渾噩噩，最近收到仔女學費單要交六位數字，個人即刻醒晒。今次淨係運費都要六位數字，希望可以有啲現金回流番嚟。」
