《壹週刊》經常刊登的心理測驗，屬於無厘頭得啖笑之「作」。今期透過圖解，要你揀通往公園噴泉由A到G七條大路，每個答案有不同分析。點解路是七條而唔係廿三條？點解係噴泉而唔係廣場紀念碑或者碼頭五枝旗桿？我最鍾意老作，曾經想過做這些心理測驗的寫手，專門堆砌剪接，別人得個睇字，無辦法跟我辯論，不必回應駁嘴，認真夠權威。
皇馬訪港，記者最喜歡問fans，鍾意哪個球星。揀23號碧咸，還是5號施丹、7號魯爾、10號費高、11號朗拿度、1號卡斯拿斯以至3號卡洛斯，心理測驗應該得出完全不同解讀。在《壹》未寫前，我捷足先登，搶灘老作過把癮：揀碧咸是穩陣派，不喜走偏鋒，喜歡埋堆，性格樂天，但易受驚退縮，欠缺探險精神。揀施丹的人愛低調，是實幹派。但太內向，人際關係過份被動，易受挫折鑽牛角尖。揀魯爾的球迷是容易受傷的男女，愛心爆棚，是最溫柔亦是最纏身的情人。揀費高的獨立倔強，識英雄重英雄，喜歡朋友多過情人。揀肥哨的天真無邪，但情緒化，多情多疑，歡笑與眼淚搞不清。揀最性感門將卡斯拿斯的人，刁鑽古怪，對人對事都有潔癖，對死黨好友專一到黐黐地。揀卡洛斯的，老老實實，你唔怕蝕底唔介意食死貓的性格，遲早出事，玩殘自己。揀希古拿或者沙加度？別玩測驗了，快去睇精神科，準備07年選特首啦！