將於九月舉行嘅法蘭克福車展上，越野路華將展出Facelifted新版Freelander；新車除造型較前變得更富吸引力外，就連車廂布局亦有改動，絕能予人有耳目一新之感。據聞新車可望於明年上半年抵埗，不如家陣一齊嚟先睹為快，睇吓新車有何過人之處啦！
記者：鄭達基
相信當大家第一眼望見Facelifted新版嘅越野路華Freelander時，定會發覺一組頭燈用上與同廠旗艦級型號RangeRover嘅相同設計，響全新鬼面罩與車身同色嘅泵把襯托下，車首造型望落較前更具霸氣；另外，一組以雙圓燈組合示人嘅頭燈，其照射範圍較現有型號多70%，以改善晚間行車嘅安全性。至於車尾方面，尾泵把亦用上與車身同色作配襯，而原設於尾泵把上嘅指揮燈，亦改置於較高位置，務求能給予尾隨車輛有更明確提示。
除外觀上有所改動之餘，就連車內配搭亦略有修改，如座椅改用新設計及新物料鑲嵌而成，乘坐舒適度因而提升不少、中控台及表板旁增設有銀白面板裝飾，看來別具有一份吸引力，就連各設備嘅控制鍵亦經重新編排，絕能予人觸手可及嘅好處等等㗎！
引擎配搭方面則與現有型號一樣，備有1.8公升直4（117匹）及2.5V6（177匹）型號供用家選擇，輔以5前速手波或5前速自動波，性能表現毋庸置疑，另外重備有一套出色嘅四驅系統，以及多套電子系統如HillDescentControl等輔助，從而讓車子行走任何路面都能應付自如呢！