我求大俠身為香港球迷，睇住皇馬班球員賣力表現，香港隊又有波入，真係一場極具娛樂性賽事，就算同全城波友一樣押注皇馬輸盤都無所謂，最緊要睇得開心！
賽前有外國博彩公司《易勝博》開呢場亞洲盤，由最初皇馬讓兩球/兩球半，群情洶湧落飛至最後讓三球半/四球，可想而知有好多波友都估皇馬可以大勝一場，尤其六條「A」全部正選上陣，最強陣容出擊，港隊肯定有難。不過，估唔到港隊兩位援兵喺上半場省入卡斯拿斯兩粒，下半場就算有樸迪路、摩連迪斯呢批爭表現前鋒上陣，但射極都射唔入，結果維持上半場比數，只贏兩球。不過，波友如果好似我求大俠咁，睇得過癮，輸少少都無計啦，係咪！
巴西前鋒查度自從上季同士砵亭關係惡化後，目前都重未搵到班落，早前傳去英超狼隊後，𠵱家有消息話到中國投效陷於水深火熱中嘅北京現代，轉會費達二百五十萬歐元，絕對唔係小數目。如果呢位曾經攞過歐洲金靴獎嘅射手加盟，都算係近年中國最有名球星囉！
英超聯球會季前熱身賽接近尾聲，唔少球員都勇戰受傷，其中愛華頓朗尼一度話要唞成個月，好彩𠵱家傷勢無大礙，可以趕到揭幕戰作客阿仙奴。新加盟熱刺嘅簡路迪日前操練時受傷，但係據我求大俠所知傷勢唔算太嚴重，希望佢可以及時復出，等班熱刺球迷安心啲。
巴塞隆拿早前公布負債近二億美金，隊中佩奧爾就話如果可以幫到球會紓緩財政問題，唔介意球會將佢賣走「套現」，因為傳聞曼聯會開價二千萬歐元斟佢。不過，我求大俠懷疑佩奧爾係咪真心幫巴塞，據知佢要求曼聯畀七萬鎊周薪，咁高人工，我諗……
列斯未開季前負面消息一籮籮，本星期會去都柏林踢熱身賽，前鋒維杜卡就因為足踝受傷決定唔去，呢位澳洲國腳早前練習已同領隊列特因意見分歧「講手」。重有係碧堤又因為飛行恐懼症，唔願隨隊踢熱身賽。列斯季前一盤散沙，我求大俠真係戥佢哋擔心。