講到「鬼」，唔一定會嚇餐死，其實「鬼」也有受人愛戴的時候，講唔定重係你細細個已愛上它了。我講嘅係油炸鬼，一度陪伴大家長大的便宜小食。食粥時，一條雙條油炸鬼一定走唔甩。適逢「鬼節」將近，食油炸鬼不但應節，重可以細味街坊情懷，何樂而不為呢？
唔講唔知，平時喺粥舖食開嘅油炸鬼，原來可以細分為「廣東派」及「上海派」，兩派在打麵粉及製法上各有千秋，食客品嘗時可以感受到油炸鬼粉皮的質感厚薄。對於經常自詡嘴尖的香港人，知道埋油炸鬼背後的歷史和做法，先至稱得上係「全能食鬼」。
位於元朗一間專做夜市嘅麵店，顧客多是「夜蒲一族」。而這裏最出名嘅油器當然非主角「油炸鬼」莫屬。在元朗屹立超過12年嘅正記，一向標榜油炸鬼「即叫即炸」，目的是要拾回顧客對油器食品的信心保證。揸Fit人鄧生話，𠵱家油炸鬼所用嘅麵粉，比起幾年前嘅質素已經差咗好多，相信喺香港好難再食到最原始好味嘅油炸鬼，但我哋都會盡力將油炸鬼做到最好。
又脆又軟難度高
至於上海派油炸鬼嘅製作過程，鄧生話要做到「微脆而軟」，十分高難度。況且喺香港已經唔會再有年輕人學整油炸鬼，質素自然會「一代不如一代」。不過這裏的油炸鬼銷量，平均每晚都有800條，喺逆市都有咁嘅成績已算有所交代啦！
另類鬼食
用上鯇魚及油炸鬼粒炮製而成的「鬼魅魚腩」，油炸鬼滲滿秘製醬汁，香口味濃，鯇魚肉味鮮嫩滑，啖啖「鬼味」。
由西芹、腰果、辣椒醬、紅椒、青椒、牛柳粒爆香而成。牛柳粒腍滑，配料爽脆，有齊多重口感。
生蝦炒熟爆香後再蘸上豆豉醬，蝦的鮮甜配合醬料的香濃，食落口又香又辣，是送飯佳品！
正記
地址：元朗金輝徑好盛大廈1號地下
電話：24433319
營業時間：6:30pm-5:00am
喺牛頭角下邨經營接近十多年的「林泰興粥店」，主理油炸鬼嘅師傅係名副其實嘅「女鬼」。由搓麵粉到落油炸油炸鬼，整個「製鬼」過程全盤由女師傅打理。店東林友新表示，粥麵店嘅油炸鬼全部都係新鮮出鑊，待乾身後才端上飯桌，絕無花假。「其實我哋店舖有兩個製造油炸鬼嘅師傅，但論油炸鬼的鬆化和口感，女師傅的手勢都較受街坊歡迎。
大熱天時銷量稍降
有20多年炮製油炸鬼經驗嘅女師傅，認為廣東派嘅油炸鬼香軟鬆化，最適合香港人口味。至於銷量，高峯時期可以日銷1,000條，不過𠵱家大熱天時，所以每日只維持約600條的銷量。
林泰興粥店
地址：牛頭角下邨9座13-14號
電話：27592674
營業時間：6:00am-1:00am
$10一條油炸鬼！無錯，呢度嘅油炸鬼價錢比其他舖至少貴一倍。但油炸鬼鬆脆宜人、無油，其質素之佳連佘詩曼、謝霆鋒等明星藝人都經常幫襯。負責人話「油炸鬼都係即叫即炸，其實油炸鬼擺得耐一定唔好食，而且即叫即做可以維持成本，加埋秘製油炸鬼方法，所以成日都吸引到唔少達官貴人光顧。」
蓮園粥麵小廚
地址：跑馬地成和道51A地下D舖
電話：28915569
營業時間：11:00am-2:30am