東方海外（316）一直傳出有大戶想減持，結果阿董嘅好友李超人真係出貨，沽出9.08%股權。據聞有人不斷搵芬佬接貨，但都冇人肯要，結果要由東方海外斥資4.6億元買番。回購價每股9.80元，雖較前收市價折讓16.6%，但如果真係抵，何不順便提出全購，將公司私有化呢？
在3月中之前，東方海外一直企於4元水平，到4月1日攀升至近6元，在4月下旬，李嘉誠申報於4月1日前透過長和系持有東方海外近10%股權，其後股價進一步升至12元。假設每股成本價為5元（應該冇咁高），今次長和系估計可賺近1倍，超過2億元。
東方海外噚日上午一度跌逾8%至10.80元，午後則大幅回升，收12.15元，升3.4%。花旗美邦話此股值10元，不過就話風險在於股份交投量及公司管治，真係唔知攞景定贈興。
皇馬旋風噚日直掃恒豐金業（870），其中一條A朗拿度專誠參觀恒豐金嘅至尊金馬桶。恒豐金送咗個金馬桶畀佢，佢就回贈簽名足球，唔知恒豐金會唔會整番個至尊金足球代替金馬桶搞宣傳呢？恒豐金造好，股價大升7%，收報1.22元，成交3282萬元。
生產電動工具嘅創科（669）近日調整一輪後，噚日借美國經濟數據利好，急升近10%，收報14.85元，成交逾1億元。
公司將於18日公布業績，據聞會幾理想，但就唔知派息好唔好。
阿虎