愛靚唔再係女仔嘅專利，男仔得閒坐埋除咗可以踢波、打機之外，重可以學白淨靚仔組合嵐兩位成員松本潤同大野智咁，整DIY首飾扮靚靚㗎！
早兩日大野拉埋老友松本，搵咗個潮流手帶店舖嘅老闆，教佢哋整條粗獷型手帶。我羅拉見佢哋嘅製成品有創意得嚟都好in，果然係有潮流觸覺喎！
不過大家唔好以為整得咁有水準，就話佢哋兩個係對住鏡頭扮專心，轉背就請槍啦！查實，松本同大智今次係由選皮、花紋釘珠同每一個釘裝細節都親力親為，其間大野就一邊揼鎚仔，一邊哼歌，反而一向自認有創作天份嘅松本，就試過揼錯要從頭嚟過。
結果兩個靚仔要四粒鐘先完成，松本話：「真係冇諗過要成四粒鐘咁耐！好鬼攰呀！」而提議松本玩呢個咁勞累嘅遊戲嘅大野，惟有儍儍陪笑，又話：「不如嚟緊嘅演唱會戴住佢吖？都係唔好，俾啲汗整霉咗咪好嘥？」