恒指變化輕微，中移動（941）則比較傷啲，收18.95元，散55仙，啲Put輪意氣風發，9847、9858同9755，打入10大升幅榜。
9847收14.6仙，升15.9%，明年1月到期，溢價12.7%，槓桿率13倍。9858收16.9仙，升15%，今年12月到期，溢價9.7%，槓桿率11.2倍。9755收8.9仙，升14.1%，明年1月到期，溢價15%，槓桿率21.3倍。中移動1周跌幅7.3%，超賣後隨時有反彈，3隻上榜Put輪溢價唔低，追唔過，追落去輸多過贏。
電盈（008）先兩日創低價後，昨日有啲反彈，收4.20元，升幅1.8%。
電盈Call輪9766由正股帶動下，彈升18.4%，收11.6仙。重有3個月就夠鐘，溢價27.8%，槓桿率36.2倍。雖然世事無絕對，但要望正股3個月內上升28%，機會真係好微，即係話隻輪去到尾作廢嘅機會好大。買9766，唔畀賣嘅話，等同與銀紙過唔去。
電盈另1隻Call輪9791，由37.5仙升上39.5仙，明年3月到期，溢價16.6%，槓桿率10.6倍。呢隻Call輪比較有譜，話晒有7個月命仔，7個月好多事物有變唔出奇，但3個星期前配股，作價4.40元，股價若然重見配股價則有大批唔使蝕嘅貨掟出，好難叻得去邊，隻輪又係冇乜值博率。
章盛