星期三會考放榜，自不然有人歡喜有人愁。成績優異嘅尖子，如果有大學收取，一於提早入大學啦，無謂讀中七。成績不如理想嘅考生，唔使氣餒，永遠有明天，肯努力嘅話，仍然有機會。
最近有幾位學生來信鬧左丁山，其中一位Mervin話：「小弟會考得十三分，但入到港大讀統計?經濟學，二級甲拿榮譽畢業，又考入華威商學院攻讀金融學……全科甲等，多科成績高於九十分……試問中五會考成績如何反映一切？」真講得好，Mervin直情係考生人辦，值得同學向佢學習。Mervin跟住話：「尖子計劃中可能真有很多有才能的人，但亦肯定埋沒了很多才華及潛能無限的人。」呢句話就反映係讀書叻，但思維混亂，尖子計劃提拔尖子，何來埋沒人才？唔係尖子嘅，如Mervin，亦一樣掂晒，何來埋沒人才？你最好請教港大經濟系猛人王于漸教授。
兩位中大學生鬧左丁山話「香港除了中文大學之外，其他七間大學都係英文大學（即以英文為教學語言）」，話左丁山亂噏，一位更加講：「香港中文大學是這所大學的文字，並不代表是用中文作教學語言啊！」請你哋了解，譬如香港大學嘅mediumofinstruction就係英文，好似女拔萃咁，上堂用中文教學，唔啱規矩。但中文大學從來不標榜英語係教學語言，教授鍾意，用英文、廣東話、普通話教學冇話唔得，全部都啱規矩。早期啲中大學生識普通話，就因為講師用國語教學之故。如果現在教授講英文教，係佢嘅自由啫！