將於明年一月七日出嫁的林雅詩自宣布息影後，不少片商爭相請她拍三級告別作，林雅詩稱曾有人讓她任意揀對手及開價，但已全部推掉，叠埋心水做人老婆。
林雅詩早前宣布將於明年一月七日與拍拖兩年的圈外男友溫文英（Man）拉埋天窗，她完成手頭上的工作後便會息影，從此告別三級，想不到她竟因此成為片商招手的對象，紛紛以甘詞厚幣游說她在婚前拍三級作告別。
但林雅詩未為所動，已推辭片商，日前她在電話中說：「呢排係有人搵我傾戲，有啲人重話可以畀我開價，當然你又唔好諗到價錢係好誇張啦，佢哋亦都願意畀我揀演員，有故事畀我揀，好似我話晒事咁。但我都唔考慮咯，因為自己都決定咗，要拍嘅話實在太大壓力啦。」
林雅詩之前簽約寰宇電影之經理人部門兩年，剛剛約滿，林雅詩日前已向公司表態不再續約，她說：「過去嗰兩年，公司對我都好好，我好多謝公司一路畀機會我，佢哋都有叫我續約，不過既然自己都諗住結婚咯，所以都唔考慮，好彩公司都好體諒我。」
近日林雅詩正忙於籌備與男友拍攝婚紗照，她笑說：「呢幾日我有好多嘢做，希望趕得切啦。我覺得今年係好年，基本上婚期唔會變，我諗到時唔會請伴郎伴娘，姊妹團都會請圈外朋友，但我都會請啲圈中人好似顏仟汶同麥家琪嚟飲。」
採訪：朱芷瑩 攝影：陳志嵐
協力：羅慧敏 化妝：Jenny 髮型：小白
泳衣：PrivateShop，Roxy
