沙士過後，各商戶食肆齊齊同心為香港，大搞減價宣傳落力拉客，就連大型商場亦不甘後人，專程找來多個全港首創或首度到港的大型遊戲，一時做笨豬同橡筋跑步角力，一時要化身做蜘蛛俠由12米高台向下攀，絕對考你膽量同體力。今次請嚟兩位辣妹測試員，挑戰難度超高的大型遊戲。
記者：尹珊珊 攝影：陳智良、周旭文
ImageGirls：Brenda、Clara（SunSpot）
逢星期一、三至五出版
「嘩！乜咁似畀細路仔玩㗎！」望住色彩繽紛的充氣跑道，Clara同Brenda不禁流露出一副不屑樣，跟手着上背部繫有橡筋的背心，踏上充氣的10米賽道上向前衝，嘗試將手中的膠貼貼在距離賽道最遠的位置，點知背後橡筋一扯，兩人即時如滾地葫蘆咁彈回起點。如是者來回幾次，Brenda最終以一個馬鼻稍勝Clara，只見兩人跌到一仆一碌，無晒儀態，唔怪得叫做「笨豬賽跑」啦！
Brenda：「無諗過條橡筋咁大力，可以一扯便將整個人拉番後，最慘係將膠貼貼上後唔記得縮手，反彈時俾膠貼擦損手。」
Clara：「同條橡筋角力好嘥氣，重要不停來回幾次，真係慘過叫我原地跑步。」
全港首創！以真人代替保齡球去擊倒球樽，玩法同「碌Ling」好唔同，參加者需要身繫繩索從高台彈出，並在空中旋轉時以身體擊倒直立在地面的巨型保齡球樽，睇落唔算好難，但每個發泡膠製的保齡球樽有成個人咁高，其實都幾考反應同體力，只見辣妹們試玩幾次都未能全中就知啦！
Brenda：「開頭以為好簡單，但原來半天吊好難控制方向，每次轉完三個圈都唔可以踢跌晒啲樽。」
Clara：「我諗唔可以全中係因為助跑唔夠，如果衝力較大可以多轉幾個圈。」
三分鐘的限定時間，徒手攀上8米高的攀石牆，絕對難不倒兩位辣妹。但接下來的測試就認真唔簡單，參賽者要好似蜘蛛俠咁，沿着12米高的石牆倒吊爬落地面。經過一輪心理交戰，Brenda竟以「擦損手」的薄弱理由，扯白旗投降；剩下Clara單拖上陣，最後在高台掙扎十分鐘、腳震尖叫、眼泛淚光之下，終於有驚無險完成「成世女最激都係今次」的任務。
Brenda：「玩攀石時掛住向上爬，唔會望到究竟有幾高，但如果調轉要望番落地，就過唔到自己嗰關。」
Clara：「企在高台時都有諗過放棄，見下面有咁多街坊望住，惟有死頂，但一路行一路腳震，落到地面重好驚。」
陸上玩滑浪風帆原來一樣咁過癮！這個由風帆改裝而成的新玩意，首度在香港曝光，玩法同真正的風帆差唔多，風帆底部會向上下轉動，速度有十級，極考驗平衡力。率先試玩的Clara選擇三級風速，但捱不過兩分鐘已被狠狠摔下來，Brenda今趟成績較理想，一直可以保持平衡，直至風速達六級，終在風帆強烈擺動下失守，總算挽回一點面子。（現在至14/8 新港城中心，16/8至31/8 新都城中心）
今期足球大旺，走了利物浦，有新鮮到港的皇家馬德里，還有這個「GOALGOAL足球」遊戲。玩法非常簡單，只要瞄準目標用腳一射即可，Clara同Brenda兩個直頭足球小將上身咁，不停起腳勁射，搞到攝影師哥哥要閃身走避，以免慘食波餅。（現在至14/8新港城中心，16/8至31/8新都城中心）
Brenda：「幾好玩，但個窿太細個，好難射入網。」
Clara：「以為好容易，原來要射中都幾難，每人得四個機會唔多夠。」
地點：馬鞍山新港城中心天幕廣場及將軍澳新都城中心二期天幕廣場
開放時間：即日至8月31日下午1時至6時
參加辦法：即日至8月31日期間，於商場購物滿$300（憑即日兩間不同商戶發票，每張金額需超過$50），可選擇試玩其中一項遊戲。