恒指再唔見29點，比較突出嘅藍籌係隻國泰航空（293），上半年蝕12.41億元，係人都知受沙士同中東戰爭影響，由於預期下半年好轉，股價反而有35仙進帳，高收11.30元。
國泰兩隻Call輪9865同9810，都有唔錯表現。9865收19.8仙，升15%，明年10月到期，溢價5%，槓桿率5.7倍。9810收26.5仙，升14%，明年4月夠鐘，溢價2%，槓桿率4.3倍。兩隻輪壽命長，溢價唔高，物有所值，只不過國泰正股距離去年10月至今年3月高位範圍11.80元唔多，恐怕再上水位有限，兩隻輪升後唔適宜高追，要買都係等吓回落時再諗。
太A（019）則冇國泰咁好彩，前日唔見1.30元之後，昨日再跌40仙，不過收市價35.60元同全日低位34.70元比較，已反彈90仙，芬佬護盤決心明顯。Call輪9660低收33.5仙，跌13%。國泰盤數見紅，太古盤數預咗唔靚，昨午派上半年成績表，估計股價可以定番，或者跟埋國泰上番啲，9660喺低位吼得過。隻輪明年1月到期，溢價4.6%，槓桿率10.6倍，數據唔錯。
中海油（883）由上周高位14元跌落嚟，昨日微跌5仙，收12.55元，應該跌定，可以收隻Call輪9535，12月到期，輪價25.5仙，溢價1.4%，槓桿率4.9倍，唔貴。
章盛