推動工業股炒風嘅金手指惠理基金，最近好似有多少轉口味，好似先排購入民企超大現代（682）股份，就令股民如癡如醉，皆因金手指一沾手，超大股價即刻勁升。
經紀陳話，查實超大並非金手指唯一沾手嘅民企，近排另一隻民企浙江玻璃（739），股價表現脫胎換骨，一氣條衝破2元。睇真啲，原來又係金手指在市場密密吸納嘅傑作，家陣計計埋埋，持股量已經超過9%。
除咗民企之外，金手指原來對H股亦相當喜好，除咗上市多年嘅安徽晥通（995）外，上市無耐嘅大陸建築Ｈ股寶業集團（2355），佢亦由公司上市開始，一直在市場買入，家陣嘅持股量佔咗寶業嘅H股8%。
浙江玻璃噚日升2.44%，收2.10元，至於寶業就更加勁，大升11.25%，收2.225元，係上市以來新高。
經紀陳又話，重有一件事好巧合，就係浙江玻璃同埋寶業，大本營位於同一條街，在浙江紹興市楊汛橋鎮。
慕容小初