美股雖然反彈，但港股反覆偏軟，恒指收報9958，跌29點，成交87.47億元。雖然格老話美國低息會持續一段較長時間，但由於美國已開始進行發債，令債券價格偏軟。經濟冇起色，但息口卻因為資金流向而被扯高，呢種係投資者最擔心嘅情況。滙豐（005）喺英國突然宣布發5億英鎊30年長債，其實亦反映該行預料未來息口會趨升，故盡快趁低息環境借錢。日後如果本港息口跟住外圍升，到時唔知香港個樓市重有冇得救呢？
近期投資者對公司派息表現相當敏感，彩星集團（635）就真係唔小心，中午公布派息0.01仙，搞到股價一度勁挫9.3%，臨到接近收市前15分鐘，公司至更正話派中期息0.01元，股價跌幅亦收窄至3.5%，收報0.83元。彩星半年業績虧轉盈，賺990萬元。
不過，黑客話彩星股價下跌，唔好完全賴晒公布派錯息，其實𠵱家嘅市況，出壞消息會掟貨，但出好消息一樣會借好消息出貨，其實睇吓隻華能（902）就可見一斑。公司中期純利增長28.6%至23億元人民幣，叫做相當唔錯，但股價一樣被質低4.76%，收10元。美資大行就話擔心華能排污費成本增加，所以沽貨。收市後，華能同分析員講，估計04年及05年有關費用會增加，分別增至2.2億元人民幣及4.2億元人民幣，相信今日重有排掟。
冠華（539）近期走勢好似散貨格，但公司下周五帶團睇廠，照計會有好消息跟尾，不過唔知會否有人借好消息出貨。
阿虎