明星夢酣　爭入藝訓班
馮仁昭四圍超：3600人想學發哥紅到發紫

香港近年經濟不景，好多人都以為娛樂圈好易賺錢，尤其係一班年輕人同啱啱畢業嘅學生，都會發吓明星夢，希望他朝可以好似藝訓班出身嘅周潤發咁勇闖荷李活。噚日無綫第十九期藝員訓練班面試，雖然只係取錄幾十人，但都吸引咗三千六百人報名，參加人數破咗近年紀錄，男仔重佔咗約二千人。

有嘢學有錢袋
噚日馮仁昭見到好多人喺將軍澳電視廣播城排隊面試，大部份都係啱啱畢業嘅後生仔，其中一位任職酒店嘅李小姐嚟面試，佢話因為藝訓班勝在多嘢學。其實藝訓班除咗有嘢學之外，學員重有幾千蚊津貼，有嘢學又有錢袋，梗係多人參加啦！
無綫製作資源部副總監區大鈞話：「面試除咗見下參加者嘅外貌外，重會畀一篇文章佢哋讀，考佢哋口齒伶唔伶俐，課程會喺十一月開始，為期半年，三個月課程、三個月實習。」

Kelly教司翰匿埋嗌交
陳慧琳（Kelly）噚日以集郵大使身份，到中環郵政總局出席「兒童郵票設計比賽2003」頒獎禮，提到佢細佬陳司翰日前喺跑馬地街頭，同前女友嗌交，又箍住對方條頸，Kelly話：「佢都好唔開心，佢哋一直好好，小風波啫，佢哋重細個，處理件事唔成熟。」Kelly話司翰已經打電話同佢前女友道歉，佢話：「我求佢唔好再去跑馬地，要耍花槍都返屋企耍啦，不過𠵱家咁都算係好大教訓啦。」

范姜Set頭見施丹
鍾鎮濤（阿B）女友范姜噚日現身中環，去set頭預備出席皇馬公益金嘅晚宴，佢話阿B心情好興奮，因為可以見到碧咸，而佢自己就反而鍾意施丹。
提到阿B同章小蕙早前喺台灣見面，范姜話：「嗰次係去接仔（指阿B大仔）啫，前後五分鐘都唔夠。」

朱茵化死人妝邪爆
由朱茵、張家輝及李蘢怡主演嘅懸疑驚慄片《心寒》，眾演員早前齊齊化死人妝拍海報，電影公司話當時攝影燈箱無端端冇電，其後全座同隔籬幢大廈亦相繼停電，最終要停止拍攝。
後來又再因為遇到颱風襲港而被迫一再延期，真係好鬼邪。好彩最終都完成拍攝，大家終於鬆一口氣。