三點式暢游　騎馬看夕陽
Tiffany魔鬼身材硬銷佬沃

李蘢怡（Tiffany）自從成功瘦身後工作接踵而來，早前她到佬沃拍攝個人寫真集，近日Tiffany便被佬沃委任為旅遊大使，據知她可得到六位數字酬勞外，更可一年內免費與家人到當地旅遊。

李蘢怡早前到菲律賓的佬沃拍攝寫真集後，她日前興奮地表示獲佬沃有關方面委任為當地的旅遊大使，Tiffany將於十二月到當地做宣傳推廣，她說：「知道可以做到旅遊大使梗係好開心啦，因為上次我去嗰度影寫真時係由當地贊助我住宿，之後個負責人睇到我本寫真集就覺得我形象好健康，所以就同我公司傾囉。」

盼有男伴
Tiffany表示當地令她最難忘就是騎馬活動，她說：「騎馬嘅地方係喺海邊，騎騎吓又可以望到夕陽，真係好靚，而且當地冇咁多香港人，所以我着三點式去游水都放心好多。」問Tiffany會否與男友到佬沃一遊時，她失望地說：「我都好想呀，可惜我冇男朋友吖，如果有嘅話我一定會同佢去海邊騎白馬，都不知幾咁浪漫呀，我都真係好想好想有拖拍呀！」

雪糕最正
Tiffany又積極推介佬沃的美食，她說：「當地有好多街邊檔嘅熱狗同漢堡包都好好食，而買手信就可以買雪糕，因為啲雪糕好滑，加上嗰度嘅人流冇泰國咁多，所以治安都好啲㗎。」
採訪、攝影：李珮洳