呢兩個星期絕對係足球熱，睇完利物浦又嚟皇馬，再加隻《WINNINGELEVEN7》，真係同世界盃嗰陣有得揮。講開又講，香港今次真係「威」晒，老翻無厘頭早過原裝出，源頭搞到滿城風雨，又話偷又話內鬼，玩到好似無間道咁，據鐵人收到嘅消息，查實啲貨到咗香港後一直喺廠入面，代理都係出貨嗰日先收到貨，試問又點出到蠱惑？
講番隻Game，相信今個暑假都冇邊隻贏到佢，𠵱家市價約$380-$390左右行貨包裝會同日本版一模一樣，不過據聞行貨亦銷得八八九九，相信會有升價壓力，有興趣記住快手。
GC隻《FinalFantasyCrystalChronicles》剛推出，今次四方果重投任天堂懷抱，終於喺GC出《FF》系列遊戲，不過撞正《WE7》就真係慘。回歸任記自然要搞搞新意思，遊戲包裝入面會送埋條GC-GBA連接線，據廠方資料遊戲如果連接GBA一齊玩，就可以開啟隱藏元素，咁即係迫你駁埋GBA玩，四方果都咪話唔識搵水，𠵱家市價約$390-$420左右，喂！冇GBA記住買埋返屋企煲機噃！