會計界大佬A先生與朋友食飯。搵埋左丁山做飯腳，有魚翅、燕窩、靚海鮮食，又唔怕去喎。與A先生相識多年，平時甚少見面，估唔到咁啱得咁蹺，大家撞到一個相同日子食晏晝也。
是日下午，政府宣佈唐英年做財政司司長，我哋見面係中午時份，A先生已一口咬定唐先生坐梗財長嘅位，佢話：「上星期六中央已經拍板，等公開宣佈而已。」左丁山儍儍哋咁問：「唐生掂唔掂呢？」A先生話：「你同我定。中央一定會全力支持，呢次唔衰得。畀幾個城市人民自由來港旅遊，只係第一步，唔得嘅話，再開放幾個城市又點話，到時一於『人浸香港』，令全港三星、四星酒店爆棚，珠寶零售生意做唔切。平價食肆亦逼爆，加上轉口生意旺盛，香港就算地產唔掂，市面都會生番晒。重有一招，就係特區唔使懼怕財赤，可以發債券，中央包銷，完全唔須理會信貸評級！橫掂美國佬逼人民幣升值，人民銀行要『排洪』，免使外滙儲備不斷上升，買港元債券話都冇咁易啦。」
A先生所言，未必無理。以前中央以為香港特區自己搞得掂，要維持一國兩制，示範畀台灣睇。點知老董唔爭氣，搞到幾十萬人上街，中央覺得冇晒菲士，於是把心一橫，一於玩「人海戰術」，實行谷番旺香港至算，唐生系出名門，係江澤民信賴之人，更容易搞啦！