哥頓胡應湘前日分拆合和公路基建上市，作為哥頓多年朋友嘅長實主席李嘉誠，並冇現身賀一賀佢。記得當日李超人頭馬霍建寧講過，如果哥頓自己搵到錢起橋，會恭喜佢；𠵱家合和公路成功上市集資，哥頓尚未收到霍大班嘅恭賀電話，但小動作就有，就係要同哥頓爭建橋。
其實自從港珠澳大橋出現爭拗後，李超人同哥頓已經冇乜偈傾，但點都估唔到當日霍大班大潑冷水嘅大橋，李超人旗下嘅長江基建竟然話有興趣競投。八方記得舊年霍大班重質疑起大橋嘅效益，又話有人想以投資建橋換取政府以免地價方式發展新貨櫃碼頭，係有人想「做佢世界」。
哥頓噚日特登見記者，話當日有人話唔畀人「做佢世界」，但係「佢做人世界」就得；哥頓又話自己喺政治上冇特別優勢，不過喺香港有啲人就有特別優勢。佢話合和喺爭橋一事並非輸梗，「唔係話有人出來要競投其他人就要行開」，但佢會以平常心對待，就算爭唔到條橋都冇問題。
呢個大橋項目係哥頓一手一腳度出嚟，推動咗好多年，諗住會有利港珠澳三地及珠三角西部發展，到今年有啲眉目，但呢個時候又有人想漁人得利，所以話呢個世界，就算係首富都唔會嫌錢多。
傳真︰2623-9278
電郵︰