皇馬訪港咁大件事，各大傳媒都搶住報道，我求驗客又點可以唔搵番啲料講下呢？喺講佢哋呢次香港行嘅趣聞軼事之前，首先想講吓對於佢哋呢次嚟香港嘅感受，就係覺得佢哋似係嚟玩，多過似嚟操練集訓嘞！
當然，有機會嚟到香港呢個「魅力之都」，係好應該爭取時間四圍去吓嘅。但睇呢班皇馬球星拎住地圖出動，重識得捐窿捐罅，一啲就走去蘭桂坊城中最熱蒲點，一啲就走落「夜總會」，後來大家重識得返去中環會合！再加上佢哋一身擺到明出去蒲嘅「夜行LOOK」，蒲到深宵至返酒店，連第二朝嘅操練課亦可以押後進行，最奇係新教練基羅斯冇話詐型噃！你話佢哋呢次係嚟練波，定係「自遊行」呢？
再睇前晚班皇馬球星嘅「自遊行」活動，「同聲同氣」嘅隊友似乎真係啱玩啲咁噃！施丹同馬基列尼兩個法國佬就一齊蒲吧；碧咸就當然係「孖」住麥馬拿文；「西班牙同鄉會」就有魯爾、摩連迪斯及古迪呢個「鐵三角」，殺落尖東夜總會，唔怪得佢哋喺球場上咁夾啦！
噚日皇馬操練有幾百個記者到場採訪，主辦機構特別預留北看台畀記者影相，我求大俠一早去霸位，利用遠攝鏡拍攝喺五十米外嘅皇馬球員操練。拍攝中途，一班西班牙記者到場，但主辦機構就安排佢哋喺東看台，同皇馬球員只有幾米遠，「遲嚟先上岸」，你話公唔公平？
噚日朝早皇馬喺大球場嘅操練課，有唔少球迷不理勸喻，睇準機會就衝落球場搵班球星簽名影相，重要係拉都拉唔住，重以為今年大球場打多次七人欖球賽㖭！我求大俠見到唔少大球場嘅保安人員，都係比較老弱之輩，完全唔夠氣同啲口靚仔球迷跑，有關方面喺呢啲場合好心就加強吓保安啦！
前日皇馬殺到，幾千個球迷塞滿機場，全港嘅行家總動員，全程追擊皇馬，噚日更幾乎全港報紙都用晒皇家做頭條封面；相反前晚喺紅館比賽嘅姚明同中國男籃，相比之下就變得冇乜人理；佢哋噚日朝早離港時，機場只有少數球迷，場面冷清，姚明今次到港可謂「生不逢時」囉！