二人女子組合2R姊妹情深，妹妹Race小時撞穿頭，家姐Rosanne即孭起妹妹染血狂奔。而Rosanne又曾因病卧床半年，其間更經常嘔。
來自星洲的姊妹花、環球二人女子組合2R，感情深厚，家姐Rosanne四年前曾受腸病之苦，日前她在電話中說：「以前我喺澳洲讀書時，唔係好識照顧自己，所以身體唔好，咁啱嗰排婆婆要做心臟大手術，我好擔心，即刻由澳洲返新加坡。
「點知自己又成日暈低，後來睇醫生，知道腸入面生咗一啲嘢，但又未係瘤嚟。醫治嘅過程中，我會嘔，好辛苦，諗起嗰段日子，都維持咗六個月。」
Rosanne續說：「我病嘅時候，Race好心痛，佢成日企喺床邊喊，又成日寫嘢畀我，叫我唔好唔開心，話好番之後一齊出去食飯。𠵱家諗番都好心酸，但係我覺得有呢個屋企好幸福，有第二世嘅話，我都希望有番同一樣嘅一家人。」
至於妹妹Race原來從小到大都非常大懵，更曾兩度跌穿頭，兩次都要入院縫針，Race在電話中說：「嗰時我大概八歲，有次喺餐廳食完印度薄餅，對手好油，跟住我走咗去花槽邊坐喺欄杆上。點知成個人向後跌，我諗當時自己有一、兩秒休克，重以為自己死咗㖭，後尾屋企人送咗我去醫院。」
九歲時，Race又再跌穿頭，她說：「嗰次家姐帶我去公園玩，我學人玩倒豎葱，點知成個人跌咗落地，個頭穿咗。家姐一邊喊，一邊孭住我返屋企，返到屋企，我哋兩個成身血，屋企人見家姐喊得咁淒涼，重以為係佢整親㖭！」
採訪：朱芷瑩
