終於等到今日，皇馬正式與中港聯隊比賽的日子，我哋終於可以望見碧咸嘅真身。開心興奮少不免，若果碧咸向你打個招呼，望住你笑，我諗你真係暈得一陣陣，點先可以搶鏡？等我哋醒你幾招啦！
記者：區佩嫦 攝影：伍慶泉
冇時間做大Banner，不妨買張海報頂當，甚或搜集各大雜誌今個星期送出的Poster；想別出心裁的話，不妨買番張曼聯時代的碧咸海報，以示忠心。
要引碧咸注意，梗係嗌佢個名，但球場咁大，你把聲蚊滋咁細，佢邊聽到，唔好睇呢個大聲公好似好簡陋，其實不知幾咁大聲，離20米遠都聽得一清二楚，不過嗌時記住要發音正確，唔係棧自己瘀。
要做Fans當然要支持偶像，帶個啦啦球喺觀眾席上打氣，一定搶鏡到飛起。
山頂嘅朋友，我哋點會忘記你呢？想睇清楚碧咸個樣，一於帶定個望遠鏡，呢款望遠鏡價錢平，望遠程度都算OK，起碼球員號碼都可以睇到。
雖然話夜晚波，若無乜風嘅話，喺球場上都幾熱，一把小小的電風扇又點可以少，呢把足球風扇仔，雖然細細把，但都幾涼㗎。
352大本營（27707352）
旺角西洋菜南街38-40號萬高大廈9樓B室
吉之島$10廣場（34282138）
銅鑼灣京士頓街9號家居廣場1樓
玩具反斗城（22657933）
九龍塘又一城L2-02店