過晒氣嘅流行天王米高積遜（MichaelJackson），近年人氣已經跌到落谷底。一向愛玩嘢嘅《攪乜鬼奪命雜作》系列，喺最新第三集裏面搵咗個十足十米高嘅人嚟扮白面鬼，簡直騎呢到嚇死人。
有睇開《攪乜鬼》系列嘅影迷都知，呢套片最鍾意翻炒各大電影裏面最經典嘅場面。喺呢套新片之中，「米高積遜」夥拍查理辛（CharlieSheen），翻玩《驅魔人》及《不速之嚇》的嚇人橋段。
呢幕故事係講查理辛聽見屋企二樓傳出怪聲，點知打開房門之際，發現一個頭披白紗嘅小朋友喺度玩緊扯線公仔，之後查理辛揭開塊布，赫然見到白面米高，繼而嚇到三魂唔見七魄。查實整容過度嘅米高，就算平日唔化鬼裝都似隻鬼，今次呢個百面米高咁恐怖，難怪連查理辛都嗌破喉嚨。
今次呢套片除咗玩《驅魔人》之外，重翻抄埋《8里公路》、《22世紀殺人網絡之決戰未來》等，就連海報都抄足《捉智雙雄》。而喺《8里公路》嗰幕，重搵Eminem個仇人JaRule客串，就擺到明玩寸個Party啦！
另外，米高積遜嘅囡囡Paris，早排喺樓梯仆落嚟，撞爆咗個鼻，唔知使唔使學爸爸咁整容，真陰功。