呢輪寶馬代理全線銷量節節上升，除以特惠價推售嘅730iA同320iA房車，備受車迷追捧而賣個滿堂紅嘅同時，全新5系未正式推出，預期可賣過百部之外，原來佢哋另一款高性能房跑車，未正式開賣亦經已接到唔少預訂Order噃！亞Mark所指咪係部M3CSL輕量版囉！全車用上大量輕量化物料，諸如車頂屬碳纖維模造，頭冚則以鋁合金配搭，而尾廂冚為塑膠料製成等，令呢部M3CSL重量只有1385kg，較原有M3偷輕成110kg㗎！唔止咁呀！動力心臟沿用一台3.2公升直6偈，惟性能卻有大躍進，馬力輸出數值提升至360ps/7900rpm，而扭力輸出亦有成37.7kgm/4900rpm，據知0至100公里加速僅為4.9秒．重要較原來M3嘅5.2秒快出一截㖭！至於車價方面，呢部M3CSL不過較原來貴多5萬蚊，只售118萬咋！聽聞首批新車有望12月抵埗，有興趣成為首批M3CSL嘅車主的話，就要快人一步落定喇！