施念慈為拍纖體廣告，日前在張學潤陪同下往揀衫，今次她只是穿背心短褲上陣，不過她不介意性感，只要效果理想，穿泳衣也在所不計。她透露曾被老公陳鴻業指她穿一件頭泳衣老套，所以現時家中有很多三點式。
施念慈（Celia）最近以六位數字接拍減肥堂廣告，現時正努力喼弗，月中她將拍硬照廣告，本周一減肥公司派了兩位職員和形象指導張學潤（Nelson）陪她往中環一時裝店買衫，最後Celia買了一件折扣後千多元的粉紅色小背心。
施念慈說：「影相要影七至八套衫，所以要再去買衫，今次影相嘅要求係上身背心，下身短褲，唔使太性感。」問是否老公陳鴻業（Alan）不讓她太性感，她說：「咁又唔係，佢好支持我拍瘦身廣告，只要影得靚就得。今次影出嚟效果好嘅話，我唔排除下次再性感啲，就算着泳衣都有得諗。我份人比較保守，以前同老公去游水，都係着一件頭泳衣，重俾佢話我老套，佢話着三點式好平常，𠵱家我屋企全部都係三點式泳衣。」
據知減肥公司要求施念慈的腰圍要保持在二十三吋半以下，體重不得超過一百零三磅，若超重就要賠錢。
對此Celia說：「我覺得呢個要求都合理嘅，我未減肥前都只係一百零三磅，如果超過呢個磅數就好肥，我𠵱家九十八磅，公司希望我減多三磅。我未減之前腰圍二十五吋，我希望減到二十二吋至二十二吋半。」而減肥公司負責人則表示找Celia拍廣告，是因為看中她的才女形象，比一般女藝人有噱頭。
採訪：馮美茵 攝影：何國豪
