電腦科技日新月異，原來透過電腦分析畫作，加上印刷技術工人嘅經驗，就可以做到幅仿真度極高嘅畫作。
好似啱啱買咗九倉葵涌都會坊半層樓面嘅博雅齋國際就獲授權，利用「博雅珂羅版技術」，複製故宮博物館珍藏、敦煌壁畫，同中國名家如吳冠中嘅作品等，每幅千幾蚊起。
但為保持作品價值，複製數量最多都係三百張左右。博雅齋同九倉合作，嚟緊兩周，會喺都會坊現樓舉行小型仿真名畫展，蘭西有時間要去開吓眼界。
電盈首個住宅項目薄扶林貝沙灣，今年第一季開賣後，已賣出百分之九十九，飲得杯落。
賣樓重臣嘅雲迪（顏金施），今日飛去法國巴黎充電之餘，也為下一期項目搜羅新擺設、新概念同新銷售策略。雲迪笑言，雖然只係去一個禮拜，但出名要求高嘅老闆李智康，當然要佢交功課，一於寓工作於娛樂之中。
電盈向來重視呢個樓盤，早排李智康就外遊吸取新靈感，搜羅珍品為第二期鋪路。
新世界發展同信和噚日喺金鐘中信大廈，堪稱「富豪飯堂」嘅海都酒樓，搞君頤峰記者會。
原本以為發展商別有用心，揀正一處可以喺對岸望到君頤峰嘅地方開記者會，點知原來係安排記者到隔籬坐直升機，等傳媒喺高空鳥瞰君頤峰，感受吓物業嘅氣勢。
咁難得有機會可以高空拍攝，但因為發展商無預早通知，所以傳媒無安排攝記出席，惟有用機仔自己影相。發展商解釋，係擔心天氣欠佳搞唔成，唔敢事先張揚，免傳媒到時空歡喜一場。
一個嚟咗香港做嘢有十二年嘅外籍客，最近終於轉租為買，用六百萬買咗西貢銀線灣海濤別墅一座單號數洋房，面積二千方呎，連花園一千方呎，有天台同車房。
聽香港置業西貢分行營業經理陳立鴻講，其實呢對外籍夫婦已經有香港身份證，一家人原本租住西貢區物業，有見於供平過租，同埋公司有房屋津貼，決定自置物業，反映佢哋喺香港落地生根。
陳立鴻話，西貢區外籍客入市嘅情況都普遍，好多鍾意買村屋住。
愉景灣海澄湖畔二段嘅低座單位，發展商將其中兩座嘅地下五百幾呎連花園一房細單位打通，叫做「創意相連」。
如此類推，樓上樓下嘅細單位，可以打通成為「創意複式」，單位款式選擇多。
發展商話，細單位打通後，售價僅四百八十萬，較容易負擔，可以吸引多啲買家。
蘭西
電郵地址：