又到一年一度嘅國際電腦展，呢個IT界最大盛事，每年都有唔少參展商擺檔，除咗盡Show旗下新產品外，好多重乘機以特惠價，散吓啲貨．今日除咗為大家率先報道現場實況外，重搵嚟唔少參展商，獨家給《蘋果》讀者多項買嘢着數㖭，讀者只需手持即日《蘋果日報》，着數優惠源源不絕。
記者：朱崇德，徐影龍
攝影：陳偉強
不經不覺，電腦展已經係第十九年舉行，雖然今年缺少SONY、SAMSUNG等大廠，不過唔少二線公司都有新產品同減價着數，無可否認係今年場地細咗，首日人流亦少咗。
BenQ今年首度參展，第一份見面禮就係3部首度在港曝光的新手機，預計3機將會在今年內推出，但價錢未定。當中最為矚目首數外置鏡頭的S830C，全鋁鎂合金機身，加優雅的摺叠機身設計和4,096色彩芒，真係型仔非常，最過癮係數碼鏡頭採用外置式，解析度為120×160像素，拍攝下來的圖片還可加上特效、文字及邊框，創造至InWallpaper。
另一部新機M770GT，亦使用好有質感嘅鈦合金外殼，機身厚度只有15mm，最強之處是加入PCSync資料同步功能，能在個人電腦作同步傳輸行事曆、電話簿、簡訊編輯，並提供16和弦鈴聲從電腦下載到手機的功能。
最後一部為S650D，此機採用輕巧雙螢幕，內置20組聲控撥號與指令設定及5種遊戲；由於兩個顯示屏使用了較低廉的黑白Mon設計，相信力攻低價位手機市場。
恒昌可算ComputerExpo老手，以最多平貨掃取勝，最抵玩係套LogitechPowerOpticalDuo，有線鍵盤加光學無線Mouse，街價$348，《蘋果》讀者價就減一百，所有腦場都包你攞唔到！其他讀者優惠還包括$1,680買PanasonicKX-P7100雷射打印機（原價$1,780），兼送水杯及雨遮一把，$88買40W輸出2.1喇叭（原價$118）等。
如果想買平數碼相機，一定要去永佳展區逛一趟，寶麗來PDC3150數碼相機做大特價，330萬像素加3倍光學變焦鏡頭，可拍AVI格式有聲短片，出面街價做緊$1,599，《蘋果》讀者價就$1,239，足足平咗$360。另外佢哋重有部好鬼馬嘅PowerView+小型WebCAM，35萬像素CMOS鏡頭，機身重細過個打火機，最強內置有2盞LED燈，在光線不足情況下，一樣可以拍到清晰影像，會場優惠價$179，《蘋果》讀者就再減$20！
網上行寬頻主力嘅$2983MB計劃，場內大做優惠，由每月100小時升級為無限上網，若簽足18個月合約，重送你iPAQh2210（PPC）或TungstenT（Palm）一部，吸引力媲美So-net送PS2。
以Scanner起家嘅Microtek，居然趁熱鬧加入數碼相機市場。呢部輸出有三百萬像素嘅Take-itS1，輕巧得嚟重可拍埋有聲短片，又或以SD卡作擴充，一千蚊有找賣價算幾抵玩，《蘋果》讀者加送輕便風扇。
場內最有諗頭算係SAFAMP3，檔攤前掛滿各式型號MP3機，吸引目光之餘又冇咁易被偷，呢部SAFA有齊至Hit功能，包括FM、多國語言顯示、藍光屏幕同內置埋喇叭仔㖭。
Click-Pub大推$500訂閱計劃（一年），贈品大手筆勁送摺叠式單車，聲寶微波爐等，差不多等於免費訂閱．《蘋果》讀者唔幫襯都可免費獲得一本《MobileXP》。
賣自製立體相嘅攤位，一個包裝有齊軟件，十張打印紙同三個相框，賣$148唔算貴，而《蘋果》讀者只需$118。
第十九屆國際電腦展
地址：灣仔香港會議展覽中心新翼5樓
入場費：$20
開放時間：
8月8日（只供業內人士參觀）
8月9日10:30am-8:30pm（開放給公眾）
8月10日10:00am-5:00pm（開放給公眾）