股市要調整，專揀壞消息炒。美股近排經濟數據唔差，反映經濟復甦，但杜指及納指應升未升，周二晚更出現大插水，短線技術指標全面轉淡，確認展開調整。
港股情況亦差唔多，滙豐（005）業績超靚亦冇用，噚日同其他藍籌齊齊跌，恒指大跌189點，收9987。趙飛雲見恒指跌穿升軌支持，確認展開調整，所以亦按原定部署沽貨計數。
恒指RSI3峯背馳其實已出現一段頗長時間，但好友勢強，之前偷步造淡多數冇好收場，噚日午市初段恒指曾反彈近10060，幾乎令人以為大戶再出手挾淡，但恒指最後再跌穿1萬點，以接近全日低位收市，今次調整應該唔會假。
不過，趙飛雲冇心急追入Put輪，主要原因係港股50日線支持在9866，亦係雙頂頸線所在，估計會有支持及反彈，現水平追入唔太值博，建議候恒指後抽至10060-10080不破才買入Put輪，博回頭跌穿50日線下試9500。恒指Put輪可考慮9735，和黃Put輪揀9905，長實Put輪揀9866，中移動Put輪則揀9758，新地Put輪較為價外及溢價過高，正股下跌空間雖大，但計落唔值博。
若港股今日先出現反彈，亦可參照上述部署。另一方面，若恒指今日插穿50日線收市，則等恒指完成尋底買貨。
趙飛雲