姚明旋風雖然被皇馬搶去不少，不過有麝自然香，不少球迷依然想一睹這位NBA「人氣中鋒」的風采，風采易睹，但一班唔使瞓街、唔使上網炒飛、唔使租的士追偶像的年輕人，居然可以與姚明同場切磋球技，甚至GiveMeFive，令場邊嘅我流晒口水。唔單止咁，姚明睇完呢班NIKELeague精英表演的花式及射球技巧都大叫好，一於睇睇呢班後生細仔點勁法。
記者：區佩嫦 攝影：周旭文、伍慶泉
今次中國隊的焦點全落在姚明身上，而場內的焦點則落在切磋球技的一PART，有幸與姚明切磋的全是NIKELeague精英隊及青苗隊的中鋒。雖然姚明與一班籃球小將切磋有點以小欺大，不過話晒都係NBA巨星，點都會讓吓後生仔。
切磋時姚明以大哥哥身份教導這班小將，以中鋒而言，硬淨、襟撞是最基本的要求，不過個人技巧及基本功夫亦不可少。兩位小將蘇伊俊及黃鎮偉接受完姚明的教導後，均茅塞頓開，發現原來平日的技巧尚有改進之處。「好似保護籃球的動作，我哋一般都將球放在腰位，原來咁樣好易令人拍走個波，應該將波放在膊頭上，咁樣就無咁易被人打到個波，佢講完之後，我哋先知原來中鋒要咁做。」蘇伊俊表示。
雖然姚明有放軟手腳之嫌，不過一班小將都唔理咁多，只要在姚明身上學到真功夫已心滿意足，問小將點同姚明溝通，他們笑稱：「用普通話囉，我哋啲普通話都OK，起碼同姚明都溝通到，不過佢教波時我哋都好緊張，覺得好似發緊夢咁，真係好開心，雖然明知佢讓我，但咁都學到啲超班技巧。」除了基本技巧要改善外，姚明重語重心長咁同呢班年輕人講：「籃球基本功好重要，要練好基本功，最緊要多練習。」各位以姚明為目標的小將，記住努力啦！
中國新星朱芳雨風采與姚明不相伯仲，不過在射3分波挑戰賽時，朱芳雨竟然失手，與小3分波王李劍煌平手，事後朱芳雨重俾姚明瘀㖭！問劍煌居然越級挑戰與朱芳雨打平手，他笑言：「無諗過，初初入到場都好緊張，不過諗住無得鬥，所以咪當遊戲咁玩，無壓力之下可以同朱芳雨打成平手，我都覺得好突然，喺比賽前朱芳雨都有教路，提點我射波要用腕力，原來我平日一直用錯力，今次同到朱芳雨比賽又可以見到姚明，我不知幾咁開心。」
入樽超勁的姚明當然要表演佢嘅入樽技巧，只要姚明入樽成功，全場的歡呼聲真係勁到拆天咁。不過場邊的我覺得姚明入樽真係EasyJob，佢簡直唔使用力跳高，只係輕輕一跳就已經可以將個波放喺籃邊，真係誇張到暈。
講番班小將，其實佢哋玩入樽花式都唔錯，好似呢位入樽小將洪建亮，姚明睇完後拍爛手掌兼高舉10分分牌。亮仔話入樽講求彈跳力及瞄準度，重要兩者配合，咁先可以入樽成功。問亮仔姚明是否其偶像時，亮仔居然答：「唔係！我偶像係高比拜恩，不過我見到姚明都好興奮、好開心。」
入樽其實都可以稱為花式籃球，不過連姚明都大讚好睇的一場花式籃球，便是前天於中澳大戰時，中場休息的一場精采表演，這表演是由一班籃球精英聯合而成的NIKEDreamTeam，這場花式籃球與HipHop融合，有點黑人味道，又有籃球的刺激感，當中有幾個難道極高的動作，連我都睇到目瞪口呆，一於精選幾個難度動作畀各位睇睇。
高速胯下運球
左右手輪流拍動籃球，而籃球要保持在膝頭以下兼必須於地上同一點，難度都唔少。這動作的重點在於籃球拍動時要保持原地，拍時應該用手指拍，咁先可令個波「聽聽話話」。
轉臂大迴環
難度超高的花式，要將個籃球在手指上高速轉動，然後將個波在腋下迴環，這個動作的重點在於籃球要保持高速轉動，而經腋下時又要慢，重要小心俾件衫阻住，連DreamTeam教練都話難度超高，佢都做唔到。