麥肯錫交畀「明天會更好基金」嘅報告，講點樣重振香港競爭力，隻字不提地產，竟然講環境教育、文化藝術係好重要。呢份報告三個星期前已送咗畀特首睇，相信佢唔會睇得入眼！
梁錦松未退任前，曾提過在工業大廈搞藝術SOHO，搞活文化氣氛。人走茶就涼，政府唔知會唔會再講呢啲政策呢？不過樣樣嘢等政府推動喎，蛇都死啦，香港人勝在有活力，樣樣主動，只要政府唔好亂咁干預，自己就會搞得掂。
嗱，星期日下午，藝術B就到沙田火炭工業區兩頭望，想話睇吓啲工業大廈嘅情況。問佢點解大熱天時走入「火炭」，唔怕中暑乎？藝術B話：「我聽聞中文大學藝術系班教員紛紛到火炭買或者租工業大廈單位，作個人畫室、雕塑室之用，其中呂教授重買咗兩個單位，樓底高十五呎，夠晒高度與面積嚟做大型藝術品，佢哋班人喺某工廈嘅十二、十三、十四樓都有藝術室，逐漸形成一個體系，我都想去買或者租番一間，大家成行成市，畫完畫就坐埋飲咖啡講藝術，你話幾爽呢！」
火炭工廈越嚟越平，千零呎都只係賣二三十萬元，所以中大啲教授買得起，有啲買嚟做藏書閣，有啲買嚟做藝術館，此地有體藝中學，距離中大好近，往返方便，最適合中大教員。其他藝術家、設計家如果去埋，火炭工業區可能成為火炭藝術區。